1ܘܐܵܢܵܐ؛ ܐܵܚܘܿܢܘܵܬܝܼ̈؛ ܟܲܕ ܐَܬܹܐܠܝܼ ܠܟܸܣܠܵܘܟܼܘܿܢ؛ ܠܵܐ ܐَܬܹܐܠܝܼ ܒܗܲܡܙܲܡܬܵܐ ܓܘܼܪܬܵܐ ܝܲܢ ܒܥܵܩܸܠܕܵܪܘܼܬܵܐ؛ ܡܲܫܚܘܼܕܹܐ ܐܸܠܵܘܟܼܘܿܢ ܣܸܪ ܕܐܲܠܵܗܵܐ. 2ܣܵܒܵܒ ܕܸܢܝܼ ܕܠܵܐ ܝܲܕܥܸܢ ܓܵܘܵܘܟܼܘܿܢ ܡܸܢܕܝܼ؛ ܫܒܼܘܿܩ ܡ̣ܢ ܠܝܼܫܘܿܥ ܡܫܝܼܚܵܐ؛ ܐܘܼܦ ܐܸܠܹܗ ܡܸܚܝܵܐ ܠܙܩܝܼܦܵܐ. 3ܘܐܵܢܵܐ ܒܙܲܒܘܼܢܘܼܬܵܐ ܘܒܙܕܘܼܥܬܵܐ ܘܒܪ̈ܲܬܪܲܬܬܵܐ ܪܵܒܵܐ ܗَܘܹܐܠܝܼ ܠܟܸܣܠܵܘܟܼܘܿܢ. 4ܘܗܲܡܙܲܡܬܝܼ ܘܡܲܟܪܲܙܬܝܼ ܠܹܐ ܗَܘܵܘ ܒܥܒܼܵܕܬܵܐ ܠܗܲܡܘܼܢܹܐ ܒܗܹܡܸܙܡܵܢܹ̈ܐ ܕܥܵܩܸܠܕܵܪܘܼܬܵܐ؛ ܐܸܠܵܐ ܒܡܲܕܵܥܝܬܵܐ ܕܪܘܼܚܵܐ ܘܕܚܲܝܠܵܐ؛ 5ܘܠܵܐ ܗܵܘܝܵܐ ܗܲܝܡܵܢܘܼܬܵܘܟܼܘܿܢ ܒܥܵܩܸܠܕܵܪܘܼܬܵܐ ܕܒܢܲܝ̈ܢܵܫܵܐ؛ ܐܸܠܵܐ ܒܚܲܝܠܵܐ ܕܐܲܠܵܗܵܐ. 6ܐܝܼܢܵܐ ܥܵܩܸܠܕܵܪܘܼܬܵܐ ܗܲܡܙܘܼܡܹܐ ܝܘܵܚ ܓܵܘܵܐ ܕܟܵܡܝܼܠܹ̈ܐ؛ ܐܝܼܢܵܐ ܠܵܐ ܥܵܩܸܠܕܵܪܘܼܬܵܐ ܕܐܵܗܵܐ ܥܵܠܡܵܐ؛ ܐܘܼܦ ܠܵܐ ܕܗܵܟܝܼܡܹ̈ܐ ܕܐܵܗܵܐ ܥܵܠܡܵܐ ܕܦܵܝܸܫܝܼ ܒܛܝܼܠܹܐ؛ 7ܐܸܠܵܐ ܗܲܡܙܘܼܡܹܐ ܝܘܵܚ ܥܵܩܸܠܕܵܪܘܼܬܹܗ ܕܐܲܠܵܗܵܐ ܒܣܸܪ؛ ܗ̇ܝ ܕܡܟܘܼܣܝܼܬܵܐ ܗَܘܵܐ؛ ܕܩܵܕَܡܵܝܬܵܐ ܦܪܝܼܫܵܠܹܗ ܐܲܠܵܗܵܐ ܡ̣ܢ ܩܵܕَܡ ܥܵܠܡܵܐ ܠܚܸܩܪܵܐ ܕܝܲܢ؛ 8ܗ̇ܝ ܕܠܵܐ ܕܚܲܕَ ܡ̣ܢ ܗܲܟܝܼܡܹ̈ܐ ܕܐܵܗܵܐ ܥܵܠܡܵܐ ܝܕܸܥܝܵܐܠܹܗ؛ ܣܵܒܵܒ ܐܸܢ ܗܵܘܝܼ ܗَܘܵܘ ܝܕܸܥܝܘܼܗܿ؛ ܠܹܐ ܙܵܩܦܝܼ ܗَܘܵܘ ܠܡܵܪܵܐ ܕܬܸܫܒܘܿܚܬܵܐ. 9ܐܸܠܵܐ؛ ܐܲܝܟܼ ܕܝܼܠܹܗ ܟܬܝܼܒܼܵܐ؛ ܐܵܢܝܼ ܕܥܲܝܢܵܐ ܠܵܐ ܚܙܸܠܵܗ؛ ܘܢܵܬܵܐ ܠܵܐ ܫܡܸܥܠܵܗ؛ ܘܓܵܘ ܠܸܒܵܐ ܕܒܲܪܢܵܫܵܐ ܠܵܐ ܐَܣܸܩܠܹܗ؛ ܟܠܵܝܗܝ ܡܸܢܕܝܼܵܢܵܐ ܕܗܘܼܕܸܪܹܐ ܐܲܠܵܗܵܐ ܠܐܵܢܝܼ ܕܡܲܚܸܒܝܼ ܠܹܗ. 10ܐܝܼܢܵܐ ܐܸܠܲܢ ܓܠܹܐܠܹܗ ܐܲܠܵܗܵܐ ܒܪܘܼܚܹܗ؛ ܣܵܒܵܒ ܪܘܼܚܵܐ ܟܠ ܡܸܢܕܝܼ ܟܹܐ ܬܲܦ̮ܬܸܫ؛ ܐܘܼܦ ܥܘܼܡܩܹ̈ܐ ܕܐܲܠܵܗܵܐ. 11ܣܵܒܵܒ ܐܲܝܢܝܼ ܒܲܪܢܵܫܵܐ ܟܹܐ ܝܲܕܸܥ ܡܸܢܕܝܼܵܢܹ̈ܐ ܕܒܒܲܪܢܵܫܵܐ؛ ܫܒܼܘܿܩ ܡ̣ܢ ܪܘܼܚܹܗ ܕܒܲܪܢܵܫܵܐ ܕܝܼܠܵܗ̇ ܓܵܘܹܗ؛ ܗܲܕܟܼܵܐ ܐܘܼܦ ܡܸܢܕܝܼܵܢܹ̈ܐ ܕܒܐܲܠܵܗܵܐ ܐَܢܵܫܵܐ ܠܹܐ ܝܲܕܸܥ؛ ܐܸܠܵܐ ܪܘܼܚܹܗ ܕܐܲܠܵܗܵܐ. 12ܐܝܼܢܵܐ ܐܲܚܢܲܢ ܪܘܼܚܵܐ ܕܥܵܠܡܵܐ ܠܵܐ ܩܘܼܒܸܠܲܢ؛ ܐܸܠܵܐ ܪܘܼܚܵܐ ܕܡ̣ܢ ܐܲܠܵܗܵܐ؛ ܕܝܲܕܥܵܚ ܚܲܠܥܲܬܹ̈ܐ ܕܦܸܫܠܗَܘܿܢ ܝܘܼܗَܒܹܐ ܐܸܠܲܢ ܡ̣ܢ ܐܲܠܵܗܵܐ؛ 13ܐܵܢܝܼ ܕܐܘܼܦ ܗܲܡܙܘܼܡܹܐ ܝܘܵܚ؛ ܠܵܐ ܒܗܹܡܸܙܡܵܢܹ̈ܐ ܡܘܼܠܦܹܐ ܒܥܵܠܩܸܕܵܪܘܼܬܵܐ ܕܒܢܲܝ̈ܢܵܫܵܐ؛ ܐܸܠܵܐ ܡܘܼܠܦܹܐ ܒܪܘܼܚܵܐ ܕܩܘܼܕܫܵܐ؛ ܘܡܲܕܒܼܘܼܩܹܐ ܝܘܵܚ ܡܸܢܕܝܼܵܢܹ̈ܐ ܪ̈ܘܼܚܵܢܹܐ ܥܲܡ ܪܘܼܚܵܢܹܐ. 14ܣܵܒܵܒ ܒܲܪܢܵܫܵܐ ܕܒܐܲܨܠܵܐ ܠܹܐ ܩܵܒܸܠ ܡܸܢܕܝܼܵܢܹ̈ܐ ܕܪܘܼܚܵܐ ܕܐܲܠܵܗܵܐ؛ ܣܵܒܵܒ ܢܲܙܵܢܘܼܬܵܐ ܝܢܵܐ ܐܸܠܹܗ؛ ܘܠܹܐ ܡܵܨܸܐ ܠܝܼܕܲܥܝܵܝܗܝ؛ ܣܵܒܵܒ ܕܒܪܘܼܚܵܐ ܟܹܐ ܦܵܝܫܝܼ ܕܝܼܢܹܐ. 15ܐܝܼܢܵܐ ܪܘܼܚܵܢܵܐ ܟܠ ܡܸܢܕܝܼ ܟܹܐ ܕܵܝܸܢ؛ ܘܗ̇ܘ ܡ̣ܢ ܐَܢܵܫܵܐ ܠܹܐ ܦܵܝܸܫ ܕܝܼܢܵܐ. 16ܣܵܒܵܒ ܡܵܢܝܼ ܝܕܸܥܝܵܐ ܝܠܹܗ ܚܝܼܵܠܹܗ ܕܡܵܪܝܵܐ؛ ܕܡܵܠܸܦ ܠܹܗ؛ ܐܝܼܢܵܐ ܐܲܚܢܲܢ ܚܝܼܵܠ ܕܡܫܝܼܚܵܐ ܐܝܼܬ ܠܲܢ.